अर्थमन्त्रीको निर्देशन कामु गभर्नरद्वारा अटेर, डा. भट्टको राजीनामा अझै अस्वीकृत

बैंकिङ

गृहपृष्ठ
बैंकिङ

अर्थमन्त्रीको निर्देशन कामु गभर्नरद्वारा अटेर, डा. भट्टको राजीनामा अझै अस्वीकृत

क्यापिटल नेपालसोमबार, वैशाख १५, २०८२

काठमाडौं। नेपाल राष्ट्र बैंकका कायम मुकायम गभर्नर डा. निलम तिमल्सिना ढुंगानाले उपप्रधानमन्त्री तथा अर्थमन्त्रीको निर्देशन पालनामा अटेरी गरेकी छिन्। कामु गभर्नर ढुंगानालाई अर्थमन्त्री विष्णु पौडेलले कार्यकारी निर्देशक डा. गुणाकर भट्टको राजीनामा स्वीकृत गर्न आइतबार निर्देशन दिएका थिए।

तर, कामु गभर्नर ढुंगानाले राजीनामा स्वीकृत नगरेको गभर्नर कार्यलयले जानकारी दिएको छ। ‘कार्यालय समय समाप्त हुँदासम्म राजीनामा स्वीकृत भएको जानकारी आएको थिएन,’ सूचना अधिकारी सुमन न्यौपानेले भने।

राष्ट्र बैंक आर्थिक अनुसन्धान विभाग प्रमुखसमेत रहेका कार्यकारी निर्देशक डा. भट्टले गत चैतमा पदबाट राजीनामा दिएका हुन्। उनको राजीनामा हालसम्म स्वीकृत भएको छैन।

गभर्नरको आकांक्षी रहेका डा. भट्टको राजीनामा स्वीकृत गर्न आइतबार अर्थ मन्त्रालयमै बोलाएर अर्थमन्त्रीले कामु गभर्नर डा. ढुंगानालाई निर्देशन दिएका थिए। मन्त्रालयमा भएको भेटमा ढुंगानालाई अर्थतन्त्रबारे छलफल गर्न बोलाएर सोही क्रममा राजीनामाबारे समेत निर्देशन दिएका हुन्।

सत्तारूढ गठबन्धनका प्रमुख दलहरू नेपाली कांग्रेस र नेकपा एमालेबीच डा.भट्टलाई राष्ट्र बैंकको गभर्नर नियुक्त गर्ने सहमति भएको चर्चा सार्वजनिक भएपछि भट्टले कार्यकारी निर्देशक पदबाट राजीनामा दिएका थिए।

तर, आफूसमेत गभर्नरको आकांक्षी रहेको भन्दै कामु गभर्नर डा. ढुंगाना प्रतिस्पर्धीलाई बाटो सहज नगर्ने पक्षमा अडिक रहेकी छन्। चौतर्फी दबाब आउँदा पनि ढुंगाना राजीनामा स्वीकृत नगरेकी हुन्।

प्रकाशित मिति: सोमबार, वैशाख १५, २०८२ १८:४७

प्रतिक्रिया दिनुहोस्