सांसद लामिछाने पक्राउको जानकारी सभामुखलाई दिइयो, प्रतिनिधिसभामा टाँसियो सूचना

राजनीति

गृहपृष्ठ
राजनीति

सांसद लामिछाने पक्राउको जानकारी सभामुखलाई दिइयो, प्रतिनिधिसभामा टाँसियो सूचना

क्यापिटल नेपालशनिबार, कात्तिक ३, २०८१

काठमाडौं। सभामुख देवराज घिमिरेलाई संसद् सदस्य रवि लामिछाने पक्राउ परेको जानकारी गराइएको छ। जिल्ला प्रहरी कार्यालय कास्कीले सभामुखलाई त्यससम्बन्धी जानकारी लेखिपठाएको संघीय संसद् सचिवालयका महासचिव पद्मप्रसाद पाण्डेयद्वारा जारी सूचनामा उल्लेख गरिएको हो।

चितवन निर्वाचन क्षेत्र २ बाट निर्वाचित लामिछानेलाई कास्की जिल्ला अदालतको पक्राउ अनुमतिबमोजिम फौजदारी कसूरको अनुसन्धानका क्रममा पक्राउ गरिएको सूचनामा जनाइएको छ। लामिछाने पक्राउ सूचना संसद्मा टाँस गरेर जानकारी गराइएको छ।

प्रतिनिधिसभा नियमावली, २०७९ को नियम २४८ को उपनियम २ मा संसद् बैठक नचलेको अवस्थामा सांसद पक्राउ सम्बन्धी सूचना प्राप्त भएमा सभामुखले सचिवालयको सूचना पाटीमा सोको सूचना टाँस गर्न लगाई सार्वजनिक गर्न लगाउनेछ’ भन्ने प्रावधान रहेको छ।

नेपालको संविधानको धारा १०३ को उपधारा ६ मा ‘संघीय संसद्को कुनै सदस्य पक्राउ गरिए पक्राउ गर्ने अधिकारीले त्यसको सूचना सम्बन्धित सदनको अध्यक्षता गर्ने व्यक्तिलाई तुरुन्त दिनुपर्नेछ’ भनी उल्लेख छ।

शुक्रबार सांसद लामिछानेलाई सहकारी प्रकरणमा काठमाडौंबाट पक्राउ गरी जिल्ला प्रहरी कार्यालय कास्की लगिएको छ। आइतबार उनलाई अदालतमा पेस गरेर अनुसन्धान प्रक्रिया अघि बढाउने तयारी छ।

सूर्यदर्शन सहकारीको संस्थापक अध्यक्ष गीतेन्द्रबाबु (जीबी) राईसँग मिलेर लामिछानेले गोर्खा मिडिया नेटवर्कमा रकम ल्याएर अपचलन गरेको मुद्दा जिल्ला प्रहरी कार्यालय कास्कीले अनुसन्धान गरिरहेको छ।

प्रकाशित मिति: शनिबार, कात्तिक ३, २०८१ १७:२०

प्रतिक्रिया दिनुहोस्