महिला टी २० विश्वकपः इन्डियाले पाकिस्तानलाई हरायो, श्रीलंकाको पनि जित

काठमाडौं- दक्षिण अफ्रिकाको केप टाउनमा आईसीसी टी २० विश्व्कप अन्तर्गत आइतबार राति सम्पन्न भएको खेलमा इन्डियाको महिला टिमले पाकिस्तानलाई ७ विकेटले हराएको छ। केप टाउन रंगशालामा १५० रनको लक्ष्य पाएका इन्डियाले एक ओभर बचाउँदै तीन विकेटको क्षतिमै जित निकालेको हो।

भारतका लागि जेमिनाह रोड्रिग्वेजले आठ चौकका साथ ५३ रनको अर्धसतकीय पारी खेलिन। त्यसक्रममा पाकिस्तानकी नस्रा सन्धुले दुई विकेट लिएकी थिइन्। त्यस्तै, पहिलो पारीमा पाकिस्तानकी कप्तान विश्म मरुफले ६८ रन बनाएकी थिइन्।

यद्यपी पाकिस्तानले चार विकेटको क्षतिमा १४९ रन मात्र बनाउन सकेको थियो। भारतका लागि राधा यादवले दुई विकेट गिराएकी थिइन्।

यता श्रीलंकाले पनि लिग चरणमा दोस्रो जित निकालेको छ। 

श्रीलंकाली ब्याटर हर्शिथा समराविक्रमाले ६५ रनको अर्धसतकिय इनिङ खेल्दै बंगलादेशलाई हराएकी थिइन्। विश्वकपमा लगातार दोस्रो जित निकाल्ने क्रममा श्रीलंकाले बंगलादेशलाई ७ विकेटले हराएको हो।

बंगलादेशले दिएको १२७ रनको लक्ष्य श्रीलंकाले १८ ओभर दुई बलमै तीन विकेट गुमाएर पुरा गरेको थियो।