काठमाडौं- काठमाडौंमा सम्पन्न सातौं संस्करणको एनभीए पुरुष तथा महिला भलिबल क्लब च्याम्पियनसिपको सर्वोत्कृष्ट खेलाडीमा महिला तर्फ नेपाल पुलिस क्लबकी उषा भण्डारी र पुरुष तर्फ टिपटप हेल्प नेपालका मुवासर राजा घोषित भएका छन्।
पुलिसलाई महिलातर्फको उपाधी दिलाएकी भण्डारी र पुरुष तर्फको उपाधी आर्मीको हातबाट खोस्न महत्त्वपूर्ण भूमिका खेलेका मुवासर सर्वोत्कृष्ट भएका हुन्।
च्याम्पियनसिपमा उत्कृष्ट सेटरमा महिला तर्फ पुलिसकी कमला पुन र पुरुष तर्फ आर्मीका हरिहजुर थापा भए । यस्तै डिफेन्स तर्फ न्यू डायमन्डकी सलिना श्रेष्ठ र टिपटप हेल्प नेपालका दीपक थापा रहेका छन् भने सर्भर तर्फ महिलामा आर्मीकी संगम महतो र पुरुष तर्फ टिपटप हेल्प नेपालका मुवासर राजा रहे ।
यस्तै वेष्ट ब्लकरमा महिला तर्फ एपिएफकी कविता भट्ट र पुरुष तर्फ नेपाल पुलिस क्लबका नविन नगरकोटीलाई घोषणा गरिएको छ। वेष्ट स्पाईकरमा महिला तर्फ न्यू डायमण्डकी प्रतिभा माली र पुरुष तर्फ आर्मीका धन बहादुर भट्ट रहँदा वेष्ट कोचमा महिला तर्फ नेपाल पुलिसका रुपेश बिष्ट र पुरुष तर्फ टिपटप हेल्प नेपालका उत्सव खड्का रहे ।
च्याम्पियनसिपको सर्वोत्कृष्ट खेलाडीले २५ हजार र हरेक विधा (स्पाइकर, सेटर, ब्लकर, सर्भर, डिफेन्स र प्रशिक्षक) ले जनही १५ हजार रुपैयाँ प्राप्त गरे । त्यस्तै इन्टरनेट सेवा प्रदायक भाएनेटले प्रतियोगिताको विधागत उत्कृष्टलाई ३ महिना र सर्वोत्कृष्ट पुरुष र महिला खेलाडीलाई ६–६ महिनाको इन्टरनेट सेवा प्रदान गर्नेछ ।
प्रकाशित: Jan 15, 2023| 20:56 आइतबार, माघ १, २०७९
