काठमाडौं– अख्तियार दुरुपयोग अनुसन्धान आयोगले टी२० क्रिकेट लिगमा सहभागी ६ वटा टिमबाट खेल्ने विदेशी खेलाडीको श्रमस्वीकृतिबारे श्रम तथा व्यवसायजन्य सुरक्षा विभागसँग जवाफ मागेको छ। लिगमा श्रमस्वीकृति नलिई विदेशी खेलाडी सहभागी भएकोबारे उजुरी परेपछि अख्तियारले विभागसँग जानकारी मागेको हो।
‘त्रिवि क्रिकेट मैदान कीर्तिपुरमा सञ्चालन भइरहेको टी२० क्रिकेट लिगमा विदेशी खेलाडी श्रमस्वीकृति तथा अनुमतिबिना खेलिरहेको विषयमा परेको उजुरीका सम्बन्धमा सात दिनभित्र सम्बद्ध कागजातसहितको राय प्रतिक्रिया यस आयोगको महाशाखा नम्बर ९ मा प्राप्त हुने गरी उपलब्ध गराइदिनु हुन अनुरोध गरिन्छ,’ आयोगले भनेको छ।
नेपाल क्रिकेट संघ (क्यान) र भारतीय कम्पनी सेभेन थ्री स्पोर्टसको आयोजनामा जारी नेपाल टी२० लिगमा म्याच फिक्सिङको कुरा उठेपछि अख्तियारले यसबारे पनि अनुसन्धान गरिरहेको छ।
मंगलबार बिहान नेपाल टी२० का कमेन्टेटर सचिन तिमल्सेनाले फिक्सिङ भइरहेको दाबी गर्दै सामाजिक सञ्जालमा भिडियो पोस्ट गरेका थिए। मंगलबार नै काठमाडौं नाइट्सका कप्तान ज्ञानेन्द्र मल्लले पनि आफ्ना एक खेलाडीलाई फिक्सिङको प्रस्ताव आएको खुलाएका थिए।
फिक्सिङको चर्चा चलेपछि गृह मन्त्रालयले अनुसन्धान अगाडि बढाउन अख्तियारलाई पत्र लेखेको छ। यस्तै, अन्तर्राष्ट्रिय क्रिकेट परिषद्को एन्टी करप्सन युनिटका प्रतिनिधिले पनि केही खेलाडीमाथि अनुसन्धान भइरहेको जानकारी दिएका छन्।
प्रकाशित: Jan 04, 2023| 12:55 बुधबार, पुस २०, २०७९
