लिग चरणका सबै खेलमा हार बेहोरेको नेपालले सेमिफाइनल खेल्ने

काठमाडौं- काभा यु-२३ पुरुष भलिबल च्याम्पियनसिप प्रतियोगिताको लिग चरणका सबै खेलमा नेपाल पराजित भएको छ। 

शनिबार भएको लिग चरणको अन्तिम खेलमा नेपालले किर्गिस्तानसँग ३–२ सेटमा हार बेहोरेसँगै नेपाल लिगका सबै खेलमा पराजित भएको हो।

नेपालले अब अन्तिम खेलमा लिग चरणको विजेतासँग खेल्नेछ। शाहीद सुहरावर्दी इनडोर स्टेडियमममा जारी खेलमा पहिलो  सेट २५–१६ ले गुमाएको नेपालले त्यसपछि दोस्रो सेटमा पुनरागमन गर्दै २५–२३ को जित निकाल्यो।

त्यसपछि नेपालले तेस्रो सेट २५–१७ ले गुमाएको थियो। नेपालले चौथो सेट २५–१९ मा जित निकाल्दा अन्तिम सेटमा किर्गिस्तानले १५–६ को जित निकाल्यो।

च्याम्पियनसिपमा आयोजक बंगलादेशसँगै नेपाल, श्रीलंका र किर्गिस्तान गरी चार टोलीको सहभागिता छ। सबै खेलमा हारका बाबजुद पनि नेपालले च्याम्पियनसिपको सेमिफाइनल खेल भोलि खेल्नेछ।  

प्रतियोगितामा चार टोलीको मात्र सहभागिता भएको हुनाले चारै टोलीले सेमिफाइनलमा स्थान बनाएका हुन्।