महिला साफमा नेपालले बंगलादेशलाई हरायो

काठमाडौं– बंगलादेशमा जारी यू १५ महिला साफ च्याम्पियनसिपमा नेपालले आयोजक बंगलादेशलाई हराएको छ। वीर श्रेष्ठ सहिद मोस्तफा कमल रंगशालामा आज साँझ सम्पन्न खेलमा नेपालले बंगलादेशलाई १–० ले हराएको हो।

बंगलादेशलाई हराएपछि नेपाली टिमकी प्रशिक्षक भगवति राना मगरले दोस्रो हाफमा अग्रनाइज भएर खेल्दै जित निकालेको बताइन्। उनले भनिन्, ‘पहिलो हाफमा हामीले राम्रोसँग खेल्न सकेनौँ। तर दोस्रो हाफमा मिलाएर खेल्न सक्यौँ।’

पहिलो हाफा गोलरहित बराबरी भए पनि निर्धारित समय सकिनुभन्दा तीन मिनेटअघि वर्षा ओलीले गोल गर्दै नेपाललाई अग्रता दिलाएकी थिइन्। सो अग्रतासँगै नेपालले जित निकालेको हो।

‘साफको पहिलो  जितले हामीलाई उत्साही बनाएको थियो। आज बंगलादेशलाई जितेर  पनि उस्तै खुसी छौं तर आचर्यवाला जित चाहिँ होइन यो,’ मुख्य प्रशिक्षक भगवतिले खेलपछि भनिन्। उनले आज नेपालको दिन राम्रो रहेको र बंगलादेशको वक्षमा लक नरहेको पनि बताएकी छन्।

डबल राउन्ड रोबिन शैलीमा हुने प्रतियोगिताको शीर्षस्थानमा रहेने टिमले प्रतियोगिता जित्नेछ। पहिलो खेलमा भुटानलाई बंगलादेशले ८–० ले हराएको थियो। पछिल्लो खेलमा नेपालले भुटानलाई ७–० ले हराएको थियो।

यससँगै दुवै टिमको समान ३–३ अंक थियो। आज जित निकालेपछि भने नेपालले ६ अंक बनाएको छ।