राष्ट्रिय खेलकुदमा कराँतेतर्फका ‘इभेन्ट’हरू आजदेखि

पोखरा- नवौं राष्ट्रिय खेलकुद प्रतियोगिता अन्तर्गत कराँतेतर्फका ‘इभेन्ट’हरू आजदेखि पर्वतको कुश्मामा सुरु हुँदै छन्। 

पर्वत जिल्ला कराँते संघका संयोजक तथा स्थानीय आयोजक समितिका सदस्य राम श्रेष्ठका अनुसार विभिन्न १९ वटा ‘इभेन्ट’ मा हुने प्रतियोगिताको उद्घाटन खेल शनिवार बिहान आठ बजेका लागि तय गरिएको छ। 

पहिलो ‘इभेन्ट’का रूपमा पुरुषको एकल काता हुने भएको छ। शनिबार नै महिलाको एकल काता, पुरुषको समूह काता र महिलाको समूह काता हुने छ। काताको सेमिफाइनल र फाइनल खेल दिउसो दुई बजेपछि राखिएको छ।

असोज ३० गते बिहान आठ बजेदेखि खेलहरू हुने छन्। जसमा महिला ५५ के.जी, पुरुष ७५ के.जी, महिला ६१ केजी, र पुरुष ८४ केजीभन्दा माथिको तौल समूह गरेर चार वटा खेल हुने छन्। यी समूहको सेमिफाइनल र फाइनल खेल दिउँसो एक बजेपछि सुरु हुने छन्। 

असोज ३१ गते पुरुष ६० केजी, महिला ६८ केजीभन्दा माथि, पुरुष ६७ केजी र महिला ६८ केजीभन्दा तल र पुरुष ८४ केजीभन्दा तलको तौल समूहमा प्रतिस्पर्धा हुने छन्। यी विधाको सेमिफाइनल र फाइनल खेलहरू सोही दिनको दिउँसो एक बजेपछि खेलाउने तयारी छ। 

कात्तिक एक गते महिला ४५ केजी, पुरुष ५५ केजी, महिला ५० केजी र पुरुष ५० केजी तौल समूह गरेर चार वटा ‘इभेन्ट’मा खेल हुने छन्। यी समूहका खेलको सेमिफाइनल तथा फाइनल खेल पनि दिउसो एक बजेपछि हुने छन्। 

कात्तिक दुई गते पुरुष टिम कुमुते (सामूहिक फाइट) र महिला कुमुते ‘इभेन्ट’ मा खेल हुने छन्। टिम कुमुतेको सेमिफाइनल र फाइनल खेल सोही दिन दिउँसो एक बजेबाट सुरु हुने छन्।