राष्ट्रिय खेलकुदको फुटबलमा आर्मीले लुम्बिनीलाई ४–१ ले हरायो

पोखरा– नवौं राष्ट्रिय खेलकुद प्रतियोगिता अन्तर्गत पुरुष फुटबलमा विभागिय क्लब त्रिभुवन आर्मी क्लबले सानदार जित निकालेको छ। लामाचौर गोस्तेघाट खेल मैदानमा शुक्रबार भएको  खेलमा आर्मीले लुम्बिनी प्रदेशलाई ४–१ को फराकिलो गोलअन्तरले हराएको हो।

खेलमा आर्मीले खेलको सुरुवातमै गोल गर्दै अग्रता लियो । खेलको पाँचौं मिनेटमा दीनेश हेम्जनको गोलमा आर्मीले अग्रता लिएको थियो। २४ औं मिनेटमा लुम्विनीले आत्मघाती गोल गर्दा आर्मीले पहिलो हाफमा २–० को अग्रता बनायो। दोस्रो हाफमा थप दुई गोल गर्दै आर्मीले सहज जित निकालेको हो।

खेलको ४७ औं मिनेटमा जर्ज प्रिन्स कार्कीले गोल गर्दै अग्रता फराकिलो बनाए। ५० औं मिनेटमा लुम्बिनीका चेतन थारुले गोल गर्दै खेलमा फर्किने प्रयास गरेको थियो। तर बलियो आर्मी विरुद्ध लुम्विनीले खेलमा फर्कन गरेको प्रयास असफल रह्यो । आर्मीका नवयुग श्रेष्ठले ९२ औं मिनेटमा गोल गरे।