महिला ह्याण्डबल : कर्णालीको पहिलो, प्रदेश १ र गण्डकीको दोस्रो जित

काठमाडौं- पोखरामा जारी नवौं राष्ट्रिय खेलकुदअन्तर्गत महिला ह्याण्डबलमा कर्णालीले जित निकालेको छ। समूह ‛बी’मा रहेको कर्णालीले आफ्नो दोस्रो खेलमा पहिलो जित निकालेको हो। 

पोखरा रंगशालास्थित बहुउद्देश्यीय कभर्ड हल मंगलबार दिउँसो सम्पन्‍न खेलमा कर्णालीले मधेशमाथि ११–७ ले जित निकालेको हो। मधेशविरुद्ध कर्णालीकी अञ्जली शाही र संगीता सिंहले सर्वाधिक समान ५-५ स्कोर गरे। 

जितसँगै कर्णालीले महत्वपूर्ण ३ अंक बटुलेको छ। मधेश प्रदेश भने लगातार दोस्रो खेलसम्म पराजित छ। मधेशले पहिलो खेलमा विभागीय टिम नेपाल आर्मीसँग २–४६ ले हार व्यहोरेको थियो। कर्णालीले पहिलो खेलमा प्रदेश-१ संग ४-२६ ले हार व्यहोरेको थियो। 

त्यसैगरी आजै भएको अर्को खेलमा भने प्रदेश–१ ले लगातार दोस्रो जित निकालेको छ।

पोखरा रंगशालाको कभर्ड हलमै भएको खेलमा प्रदेश–१ ले बागमती प्रदेशलाई २४–८ ले पराजित गरेको हो। पहिलो खेलमा सोमबार कर्णालीविरुद्ध २६–४ ले जित निकालेको प्रदेश–१ ले अपराजित रहँदै ६ अंक बटुलेको छ। प्रदेश–१ की प्रेक्षा कटुवालले सर्वाधिक ८ गोल गरिन्।

मंगलबारकै अर्को खेलमा गण्डकीले पनि दोस्रो जित निकालेको छ। समूह ‘ए’ को गण्डकीले सुदूरपश्चिममाथि २७–४ को सानदार जित निकाल्दै ६ अंक जोडेको हो। आइतबारको आफ्नो पहिलो खेलमा गण्डकीले कर्णालीलाई ५८–२० को फराकिलो अन्तरले हराएको थियो। गण्डकीकी योगिता गुरुङले सर्वाधिक ८ गोल गरिन्।