नेपाल र केन्याको तेस्रो खेल : दोस्रो जितको खोजीमा नेपाल

काठमाडौं- नेपालले आइतबार (आज) केन्यासँग तेस्रो टी–२० खेल खेल्दै छ। केन्यामा जारी पाँच खेलको टी २० सिरिजअन्तर्गत नेपालले पहिलो खेलमा जित निकालेको हो भने दोस्रो खेलमा हार बेहोरेको थियो।

यो सिरिज जित्नका लागि तीन खेलमा जित निकाल्नु आवश्यक छ। त्यसैले नेपाल जितको लक्ष्यका साथ आज मैदान उत्रने छ।

नेपालले पहिलो खेलमा पाँच विकेटको जित निकालेको थियो भने दोस्रो खेलमा १८ रनको हार बेहोरेको थियो।

यो सिरिजमा मुख्य प्रशिक्षक मनोज प्रभाकरले नेपाली टिमका लगातार ब्याट्सम्यान कुशल भुर्तेललाई बोलाएका छैनन्। तर, राष्ट्रिय टिममा पर्न छाडेका ज्ञानेन्द्र मल्ललाई प्रभाकरले सिरिजमा बेलाएका थिए।

ज्ञानेन्द्रले पहिलो खेलमा २३ रन बनाएका थिए भने दोस्रो खेलमा एक रनमै आउट भएका थिए। जारी सिरिजमा नेपाली टिमका कप्तान सन्दीप लामिछाने र दीपेन्द्र सिंह ऐरीले उत्कृष्ट प्रदर्शन गरिरहेका छन्। आजको खेलमा पनि समर्थको ध्यान यी दुई खेलाडीमा हुनेछ।

नेपालले अब १३ गते र २४ गते केन्यासँग चौथो र पाँचौँ टी २० खेल्नेछ। टी२० सिरिजपछि नेपालले तीन खेलको एकदिवसीय सिरिज खेल्ने तालिका रहेको छ।

नौरोविको जिमखाना क्रिकेट मैदानमा नेपाली समय अनुसार पौने ४ बजेबाट खेल सुरु हुनेछ।