वन्यजन्तुबाट क्षति भएका सर्वसाधारणलाई ३७ लाख राहत वितरण

समाज

गृहपृष्ठ
समाज

वन्यजन्तुबाट क्षति भएका सर्वसाधारणलाई ३७ लाख राहत वितरण

क्यापिटल नेपाल शुक्रबार, साउन २३, २०८२

काठमाडौं। वन्यजन्तुबाट क्षति भएका सर्वसाधारणलाई डिभिजन वन कार्यालय तनहुँले करिब ३७ लाख राहत वितरण गरेको छ। डिभिजन वन कार्यालय तनहुँले मानवीय र पशुधनको क्षतिवापत ३६ लाख ९३ हजार चार सय ३९ राहत वितरण गरेको हो।

आर्थिक वर्ष २०८१/८२ मा चितुवाको आक्रमणबाट मृत्यु भएका तीन बालबालिकाको परिवार र वन्यजन्तुबाट क्षति भएका पशुधनको राहतपीडितलाई उक्त सहयोग गरिएको डिभिजन वन कार्यालय तनहुँका सूचना अधिकारी राजकुमार श्रेष्ठले जानकारी दिए।

चितुवाको आक्रमणबाट उक्त आर्थिक वर्षमा बन्दीपुर गाउँपालिकाका तीन जना बालबालिकाको मृत्यु भएको थियो। विसं २०८१ साउन ३ गते बन्दीपुर गाउँपालिका–५ कामीडाँडाका १३ वर्षीय सुन्दर कुमाल, चैत २९ गते बन्दीपुर गाउँपालिका–२ कामीडाँडामा १० वर्षीया अनुजा विक र गत जेठ २६ गते बन्दीपुर गाउँपालिका–२ कुवादीमा छ वर्षीय उत्सव गुरुङको चितुवाको आक्रमणबाट मृत्यु भएको थियो।

मृतकका परिवारलाई जनही १० लाखका दरले राहत रकम प्रदान गरिएको सूचना अधिकारी श्रेष्ठले बताए। नेपाल सरकार वन तथा वातावरण मन्त्रालयबाट स्वीकृत वन्यजन्तुको क्षतिको राहत निर्देशिका २०६९ (संशोधित २०७५) बमोजिम वन्यजन्तुको आक्रमणमा परी सामान्य घाइते भएमा ५० हजारसम्म, गम्भीर घाइते भएमा दुई लाखसम्म र मृत्यु भएमा अधिकतम १० लाखसम्म उपलब्ध गराउने व्यवस्था छ।

प्रकाशित मिति: शुक्रबार, साउन २३, २०८२ २०:४४

प्रतिक्रिया दिनुहोस्