काठमाडौं- माइतीघर मण्डलामा विरोध प्रदर्शन गर्ने अधिकारकर्मीहरुमाथि प्रहरीले धरपकड गरेको छ ।
अनसनरत गंगामाया अधिकारी र डा गोविन्द केसीको माग सम्बोधन गर्न सरकारलाई दबाव दिने उद्देश्यले प्रदर्शन गर्न पुगेका मानवअधिकारवादीसहित १२ जनालाई प्रहरीले पक्राउ गरेको हो ।
पक्राउ पर्नेमा इन्द्रप्रसाद अर्याल, चरण प्रसाईँ, महामुनिश्वर आचार्य, लोकराज अवस्थी, विश्व छवाल, जयराम दाहाल, सागर अधिकारी, मनोज अधिकारी, डा. सुरेन्द्र भण्डारी, डा. उद्धव प्याकुरेल,मोहन ज्ञवाली र लोकेन्द्र पोखरेल रहेको जनाइएको छ ।
प्रदर्शनका क्रममा अधिकारकर्मीहरुले गंगामायको जीवन रक्षा गर, गोविन्द केसीको माग पुरा गर, नागरिकको अधिकार नखोस भन्ने नारा लगाएका थिए । उनीहरुले माइतीघरमा लगाइएको निषेधाज्ञा फिर्ताको माग समेत गरेका छन् ।
सरकारले आन्दोलनका लागि स्थान तोकिदिएपछि त्यसको तीव्र विरोध भइरहेको छ । यसैविषयलाई लिएर बुधबार नेविसंघले पनि विरोध प्रदर्शन गरेको थियो ।
प्रकाशित: Dec 31, 2017| 18:23 आइतबार, पुस १६, २०७४