काठमाडौं। अन्तर्राष्ट्रिय वित्त निगम (आइएफसी) र नेपाल उद्योग वाणिज्य महासंघबीच नेपालको आर्थिक विकास, रोजगारी तथा आपसी सहकार्यका विषयमा छलफल भएको छ।
आइएफसीका दक्षिण एसिया क्षेत्रका म्यानेजर ग्रेगोरी स्मिथ तथा नेपाल उद्योग वाणिज्य महासंघका उपाध्यक्ष हेमराज ढकालबीच बुधबार महासंघ सचिवालयमा भएको भेटवार्ता भएको थियो।
सो अवसरमा बोल्दै आइएफसीका दक्षिण एसिया क्षेत्रका म्यानेजर ग्रेगोरी स्मिथले नेपालको आर्थिक विकासमा नेपाल उद्योग वाणिज्य महासंघसँग सहकार्य गर्न आइएफसी तयार रहेको बताए। नेपालको निजी क्षेत्रलाई सबल बनाउने उद्देश्यले अन्तर्राष्ट्रिय वित्त निगमले ज्ञान साझेदारी, साना तथा मझौला उद्यमहरूको क्षमता विकास र युवाहरूका लागि अर्थपूर्ण रोजगारीका मार्ग सुनिश्चित गर्न सहकर्य गर्न सकिने उनको भनाइ छ।
महासंघका उपाध्यक्ष ढकालले महासंघले विगतमा पनि आइएफसीसँगको सहकार्यमा विभिन्न काम गरेको जानकारी गराउँदै नेपालको निजी क्षेत्रको सुदृढीकरणका लागि आइएफसीको सहयोगप्रति आभार व्यक्त गरे।
महासंघको लगानी तथा अन्तरराष्ट्रिय मामिला फोरमका सभापति मनोज पौडेलले निजी क्षेत्रले पर्यटन, सूचना प्रविधि, कृषि, शिक्षा तथा स्वास्थ्यलगायतका क्षेत्रहरूमा उल्लेखनीय योगदान गरेको बताउँदै आइएफसीसँगको सहकार्यले निजी क्षेत्रको क्षमता अभिवृद्धिमा सहयोग पुगने बताए।
उनले ज्ञान आदानप्रदान, वित्तीय पहुँचको सहजता, हरित अर्थतन्त्रको प्रर्वद्धन, डिजिटल रूपान्तरण र साना तथा मझौला उद्योगको क्षमता विकासजस्ता क्षेत्रमा अन्तर्राष्ट्रिय वित्त निगमको प्राविधिक तथा संस्थागत सहकार्यको अपेक्षा राखे।
-1746083985.jpg)
