मध्यपुरथिमिको आम्दानी ६ महिनामा १४ करोड

अर्थतन्त्र

गृहपृष्ठ
अर्थतन्त्र

मध्यपुरथिमिको आम्दानी ६ महिनामा १४ करोड

क्यापिटल नेपालशुक्रबार, माघ ४, २०८१

भक्तपुर। मध्यपुरथिमि नगरपालिकाले चालु आर्थिक वर्षको पहिलो ६ महिनामा १४ करोडभन्दा बढी राजस्व संकलन गरेको छ। नगरपालिकाले आन्तरिक स्रोतबाट १४ करोड २८ लाख १९ हजार संकलन गरेको हो।

यो पालिकाको कूल वार्षिक राजस्व संकलन लक्ष्यको ३९ दशमलव ३६ प्रतिशत हो। चालु आवमा ३६ करोड २८ लाख ७ हजार आन्तरिक स्रोतबाट राजस्व संकलन गर्ने लक्ष्य रहेको छ।

उपप्रमुख विजयकृष्ण श्रेष्ठले गत आर्थिक वर्षको तुलनामा यस वर्ष नक्सा पास कम भएकाले लक्ष्यअनुसार राजस्व संकलन हुन नसकेको जानकारी दिए। गत वर्ष यस नगरपालिकाले घर नक्साको अभिलेखीकरण खुलाएको थियो।

यस वर्ष घर नक्सा पासमा राजस्व संकलनमा कमी आए पनि व्यवसाय, घरबहाल र विज्ञापन कर शीर्षकमा राजस्व वृद्धि भएको उपप्रमुख श्रेष्ठले बताए। उनका अनुसार व्यवसाय कर, घरबहाल कर र विज्ञापन कर शीर्षकमा गत आवको तुलनामा यस वर्ष दुई करोड ५२ लाख ८९ हजार ८८८ भन्दाबढी राजस्व संकलन भएको छ।

नगरपालिकाले चालु आवको पहिलो ६ महिनामा सबैभन्दा धेरै असोजमा ३ करोड ६० लाख ५६ हजार ३७, साउनमा ३ करोड २७ लाख ८५ हजार ४५२ र भदौमा २ करोड ४३ लाख ५३ हजार ४७३ आन्तरिक आम्दानी गरेको थियो।

यसैगरी कात्तिकमा १ करोड ९८ लाख १२ हजार ३६६, मंसिरमा २ करोड आठ लाख १६ हजार १७४ र पुसमा सबैभन्दा कम ९४ लाख १७ हजार ९८१ राजस्व संकलन गरिएको नगरपालिकाले जनाएको छ।

प्रकाशित मिति: शुक्रबार, माघ ४, २०८१ १७:२९

प्रतिक्रिया दिनुहोस्