टेकुमा बेड भरिएपछि संक्रमितलाई बाहिरै राखेर उपचार

काठमाडौं– टेकुस्थित शुक्रराज ट्रपिकल तथा सरुवा रोग अस्पतालमा कोरोना संक्रमतिलाई बाहिरै राखिएर उपचार गरिएको छ। अस्पतालका सबै बेड भरिभराउ भएपछि बिरामीलाई बाहिरै राखेर उपचार गराउन थालिएको निर्देशक सागरराज भण्डारीले जानकारी दिए।

उनले भने, ‘अस्पतालको एचडीयूमा ३३ बेड र आईसीयूमा २४ बेड छन्। ती सबै भरिएका छन्। अहिले २९ जनालाई बाहिरै राखेर उपचार गराइरहका छाैं। अब बाहिरै पाल टाँगेर उपचार गर्ने तयारीमा छौं।’

उनका अनुसार केही दिनदेखि बिरामीको असाध्यै चाप बढेको छ। उनले भने, ‘संक्रमित बिरामी निरन्तर आइरहेका छन्। भएका बेड सबै भरिए। त्यसैले बाहिरै राखेर उपचार गराउनुपरेको हो।’ यस्तो अवस्था कहिलेसम्म रहन्छ केही भन्न नसकिने उनको भनाइ छ।