वीरगञ्ज भन्सार पुस १ बाट दैनिक १८ घन्टा खुल्ने

अर्थतन्त्र

गृहपृष्ठ
अर्थतन्त्र

वीरगञ्ज भन्सार पुस १ बाट दैनिक १८ घन्टा खुल्ने

क्यापिटल नेपालशनिबार, मंसिर २२, २०८१

पर्सा। वीरगञ्जका दुवै भन्सार कार्यालयले पुस १ देखि दैनिक थप दुई घन्टा भन्सारको सेवा विस्तार गर्ने भएका छन्।

पर्साका प्रमुख जिल्ला अधिकारी गणेश अर्यालको अध्यक्षतामा बसेको व्यापार सहजीकरण समिति बैठकले आगामी पुस १ देखि वीरगञ्ज भन्सारमा वस्तु तथा सामानको जाँचपाँस र यात्रुको जाँचपासका लागि थप दुई घन्टा सेवा विस्तार गर्ने निर्णय गरेको हो।

प्रजिअ अर्यालले भन्सार जाँचपासको प्रक्रियालाई सहज बनाउन दुई घण्टा थप सेवा विस्तार गर्न लागिएको जानकारी दिए। ‘भन्सार जाँचपासको प्रक्रिया अहिले बिहान ६ बजेदेखि बेलुका १० बजेसम्म मात्रै हुँदै आइरहेको थियो। यसले भन्सार जाँचपास गर्ने व्यवसायी र यात्रु दुवैलाई मर्का परेको गुनासो आएको थियो,’ उनले भने, ‘व्यापार सहजीकरणको बैठकले बिहान ५ बजेदेखि बेलुका ११ बजेसम्म भन्सारको सेवा विस्तारित गर्ने निर्णय गरेको छ।’

वीरगञ्ज भन्सार कार्यालयका प्रमुख भन्सार प्रशासक दीपक लामिछानेले थप दुई घण्टा विस्तारित समयमा बैंक, क्वारेन्टाइनलगायत सबै सेवा थप हुने जानकारी दिए। ‘यसले व्यापारी तथा यात्रु दुवैलाई सकारात्मक प्रभाव पार्ने अपेक्षा राखेका छौँ,’ उनले भने।

वीरगञ्ज उद्योग वाणिज्य संघका वरिष्ठ उपाध्यक्ष हरि गौतमले भन्सारको सेवा थप भएसँगै भन्सार जाँचपास गर्ने व्यापारी तथा व्यवसायीलाई सहज हुने बताए। उनका अनुसार वीरगञ्ज भन्सार कार्यालय मातहत एकीकृत जाँचचौकी र सिर्सियास्थित सुख्खाबन्दरगाह भन्सार कार्यालय छन्।–रासस

प्रकाशित मिति: शनिबार, मंसिर २२, २०८१ १६:३५

प्रतिक्रिया दिनुहोस्