रोनाल्डोको लेट गोल, जसले युभेन्टसलाई हारबाट जोगायाे

काठमाडौं - पोर्चुगिज स्टार क्रिस्टियानो रोनाल्डोले अन्तिम समयमा गोल गरेपछि सिरी ए को साविक विजेता युभेन्टस हारबाट जोगिएको छ।

टोरिनोको घरेलु मैदानमा भएको खेलमा युभेन्टसले सुरुआती अग्रता बनाए पनि उसले अग्रता बचाउन सकेको थिएन।

खेलको १३ औं मिनेटमै फ्रेडरिको चिइसाले गोल गर्दै युभेन्टसलाई अग्रता दिलाएका थिए। तर, २७ औं मिनेटमा टोरिनोको एन्टोनियो सनाब्रियाले गोल गरेपछि खेल बराबरीमा आयो।

दोस्रो हाफको पहिलो मिनेटमा सनाब्रियाले नै गोल गरेपछि युभेन्टस २–१ ले पछि परेको थियो। 

एक गोलले पछि परेको अवस्थामा रोनाल्डोले गोल गर्दै क्लबको एक अंक रक्षा गरेका थिए। यससँगै खेलको नतिजा २–२ गोलको बराबरीमा टुंगियो।

यससँगै युभेन्टसले जारी लिगमा ५६ अंक जम्मा गरेको छ। ऊ शीर्षस्थानको इन्टर मिलानभन्दा १२ अंकले पछि छ।

इन्टर मिलानले गएरातिको खेलमा बालोग्नविरुद्ध साँघुरो जित निकालेको थियो। इन्टरका रोमेलु लुकाकुले निर्णायक गोल गरेपछि शीर्षस्थानको इन्टरले जित निकालेको हो।