७५ प्रतिशत कोरोना भ्याक्सिन १० देशको कब्जामा, १३० देशमा एक डोज पनि पुगेको छैन

काठमाडौं– संयुक्त राष्ट्रसंघका महासचिव एन्टोनियो गुटेरसले कोरोना भाइरसविरुद्धको भ्याक्सिन वितरणमा भएको असमानताप्रति चिन्ता व्यक्त गरेका छन्।

विश्वभर कोराना भ्याक्सिनको ७५ प्रतिशतमा १० वटा देशले कब्जा जमाएको भन्दै उनले आलोचना गरेका हुन्। 

बुधबार युएन सेक्युरिटी काउन्सिलको उच्चस्तरीय बैठकलाई सम्बोधन गर्दै महासचिव गुटेरसले भनेका छन्, ‘विश्वका १३० देशमा एक डोज पनि भ्याक्सिन पुगेको छैन।’ महामारीको यो संकटमा विश्व समुदायको लागि नैतिकताको परीक्षाको घडी आएको उनले बताए। 

विश्वभर नै आपतकालीन खोप अभियानका लागि विश्व समुदाय एक भएर लाग्नुपर्ने समय आएको महासचिव गुटेरसको भनाइ छ।

‘भ्याक्सिनको समान वितरण सुनिश्चित हुनुपर्छ। ठूलो अर्थतन्त्र भएका देश (जी–२०) ले इमर्जेन्सी टास्क फोर्स गठन गर्नुपर्छ। यसमा फर्मास्युटिकल कम्पनीहरुलाई पनि समावेश गर्नुपर्छ। विश्वका सात ठूला औद्योगिक देशले यसका लागि रकम जुटाउनुपर्छ,’ गुटेरसले भने।