पोखरामा झुन्डिएको अवस्थामा महिलाको शव फेला

पोखरा– पोखरा महानगरपालिका वडा नम्बर १७ फुस्रेखोलामा एक महिलाको शव रूखमा झुन्डिएको अवस्थामा फेला परेको छ। महिलाको शवसँगै डोरीमा कुकुर पनि मृत फेला परेको छ। गुल्मी चन्द्रकोट गाउँपालिका १ शान्तिपुर घर भई पोखरा–१७ बेलघारीमा बस्दै आएकी ५५ वर्षीया कोपिला राना मृत अवस्थामा भेटिएको कास्की प्रहरी प्रवक्ता डीएसपी सुवास हमालले जानकारी दिए।

उनका अनुसार सोमबार बिहान ७ बजेतिर स्थानीयले देखेर प्रहरीलाई खबर गरेका थिए। पहिला कुकुरलाई झुन्ड्याएर ती महिला आफू पनि त्यही डोरीमा झुन्डिएको हुनसक्ने प्रारम्भिक अनुमान प्रहरीले गरेको छ। स्थानीयका अनुसार मादक पदार्थकी अम्मली ती महिलासँग अरु बेला पनि उक्त कुकुर अघिपछि हिँडिरहन्थ्यो।

प्रहरीले घटनाको थप अनुसन्धान अघि बढाएको छ। महिलाको शव परीक्षणका लागि पश्चिमाञ्चल क्षेत्रीय अस्पतालमा राखिएको छ। बेलघारी स्थित छोरीको घरमा बस्दै आएकी राना नाइलनको डोरीले झुन्ड्यार  सोही डोरीमा कुकुरसहित आफू झुन्डिएको हुन सक्ने प्रहरीको अनुमान छ। उनले के कारणले आत्महत्या गरिन् भन्ने खुलेको छैन।