भारतमा कोरोना संक्रमितको संख्या १० लाख नाघ्यो

काठमाडौं- छिमेकी मुलुक भारतमा कोरोना भाइरसबाट संक्रमित हुनेको संख्या १० लाख नाघेको छ ।

पछिल्लो २४ घण्टामा ३५ हजार ४ सयभन्दा धेरैमा संक्रमण पुष्टि भएसँगै भारतमा कोरोना संक्रमितको संख्या १० लाख ५ हजार ६ सय पुगेको हो ।

लकडाउन खुकुलो भएपछि तिब्र गतिमा फैलिएको कोरोनाबाट पछिल्लो केहि हप्ता यता भारतमा हरेक दिन २५ देखि ३५ हजार व्यक्ति संक्रमित हुने गरेका छन् ।

पछिल्लो एक हप्तामा मात्रै भारतमा २ लाख १० हजार ७ सयभन्दा धेरै संक्रमित थपिएका छन् । एक महिनाको अवधिमा ६ लाख ५१ हजार ७ सय जना संक्रमण पुष्टि भएको छ ।

लकडाउन खुकुलो हुनु अघि भारतमा दैनिक २ देखि ३ हजार ब्यक्ति कोरोनाबाट संक्रमित हुने गरेका थिए । जनताको दैनिकी असहज भएको र अर्थतन्त्र चौपट भएको भन्दै लकडाउन खोलेसँगै संक्रमण तिब्र गतिमा फैलिएको दैनिक भाष्करले लेखेको छ ।

दैनिक ज्यालादारी गर्ने मजदुर वर्ग र खुद्रा व्यापारीहरु कोरोनाको उच्च जोखिममा छन् । समुदाय स्तरमा तिब्र गतिमा फैलिएको कोरोना रेल र सार्वजनिक यातायातका माध्यमबाट झनै बढि फैलिएको पाइएको छ ।

भारतमा अहिलेसम्म कोरोनाबाट १० लाख ५ हजार ६ सयभन्दा धेरै संक्रमित भएका छन् भने २५ हजार ६ सय ९ जनाको मृत्यु भएको छ।