‘बसपार्क पसलमा भएको लुटपाटको क्षतिपूर्ति राज्यले दिनुपर्छ’

कर्पोरेट बजार

गृहपृष्ठ
कर्पोरेट बजार

‘बसपार्क पसलमा भएको लुटपाटको क्षतिपूर्ति राज्यले दिनुपर्छ’

क्यापिटल नेपालमंगलबार, फागुन २, २०७९

काठमाडौं । नेपाल मोबाइल व्यवसायी महासंघले सोमबार यातायात मजदुरहरूको प्रदर्शनको क्रममा भएको लुटपाट र तोडफोडको सम्पूर्ण क्षतिपूर्ति सरकारले दिनुपर्ने माग गरेको छ । प्रधानमन्त्री कार्यालय र गृह मन्त्रालयमा महासंघले क्षतिपूर्ति र सुरक्षा माग गर्दै ज्ञापनपत्र बुझाउने निर्णय गरेको छ ।

सोमबार दिउँसो यातायात मजदुरहरूले ट्राफिक प्रहरीले लिने जरिवानालगायतको विरोध गर्दै काठमाडौंको बालाजु माछापोखरी र गोंगबु नयाँ बसपार्क अगाडि विरोध प्रदर्शन गरेका थिए । साथै, बेलुकीपख मानिसहरूको भीडले नयाँबसपार्क क्षेत्रभित्रको ल्होत्से मलमा प्रदर्शनकारीले तोडफोड गर्दै मोबाइल पसलमा लुटपाट गरेका थिए।

सोमबार लुटपाट र तोडफोडबाट ८ देखि १० करोड रुपैयाँ बराबरको क्षति भएको नेपाल मोबाइल व्यवसायी महासंघका अध्यक्ष भरत भट्टराईले बताए । उनले भने, ‘यो घटनाबाट हाम्रो सुरक्षा व्यवस्था कति कमजोर छ भन्ने पुष्टि भएकाे छ । यसको सम्पूर्ण क्षतिपूर्ति हामीलाई राज्यले दिनुपर्छ ।’

सोमबारको घटनाले नेपालमा निर्धक्क भएर व्यवसाय गर्ने वातावरण नभएको उनको टिप्पणी छ । आज मध्याह्न १२ बजे ल्होत्से मलमा पत्रकार सम्मेलन गरेर घटनाको विस्तृत जानकारी गराउँदै आफूहरूका माग सार्वजनिक गर्ने उनले बताए ।

प्रकाशित मिति: मंगलबार, फागुन २, २०७९ १२:४३

प्रतिक्रिया दिनुहोस्