सम्पादकीय : पाठकको रुचि हाम्रो हौसला

नेपाल समय स्थापनाको दुई वर्ष पूरा गरी तेस्रो वर्षमा प्रवेश गरेको छ। वार्षिकोत्सवको यो विशेष अवसरमा हामी हाम्रा पाठकसँग जिम्मेवार र व्यावसायिक पत्रकारिताको प्रतिबद्धता पुनः दोहोर्‍याउन चाहन्छौं।

नेपाली डिजिटल पत्रकारिताको इतिहास झन्डै दुई दशकको भए पनि प्रतिस्पर्धात्मक र व्यावसायिक बन्न थालेको करिब एक दशक भएको छ। स्थापित मिडिया र नयाँ खुल्ने डिजिटल मिडियाको भीडमै जन्मिएको नेपाल समयका लागि यो समय निश्चय पनि चुनौतीपूर्ण थियो/छ।

डिजिटल मिडियाको व्यापक विकास र विस्तार भइरहेको यो समयमा पाठकका लागि विभिन्न विकल्प उपलब्ध छन्। त्यसैले पत्रकारितालाई अझ विशिष्टीकरणतर्फ अगाडि बढाउन हामी प्रतिबद्ध छौं– ताकि मिडियाको भीडबाट हाम्रा पाठकले अझ उत्कृष्ट, निष्पक्ष र रोचक सामग्री प्राप्त गर्न सकून्।

सिद्धान्ततः पत्रकारले जहिले पनि रचनात्मक प्रतिपक्षको भूमिका निर्वाह गर्छ। तर, अधिकांश सरकारहरु मिडियालाई आफ्नो प्रचारप्रसार टोलीका रुपमा हेर्न चाहन्छन्। केही मिडिया यसको हिस्सा बन्छन् पनि। तर, हामीलाई थाहा छ, हाम्रा पाठक सत्य जान्न चाहन्छन्, न्यूज रुममा उत्पादन गरिएका कृत्रिम कथा होइन, न त कसैको प्रचार नै। पाठकको यही रुचि साँचो र असल पत्रकारिताका लागि हौसला बन्छ।

अर्कोतिर, डिजिटल मिडियाको बाढी, समाचार ब्रेक गर्ने होड, भिजिटर बढाउने र भाइरल हुने मोहले उत्तरादायी पत्रकारितामा नकारात्मक प्रभाव पारेको छ। तर, हामी सामाजिक रुपान्तरणका लागि, जनहितका लागि र सत्य स्थापित गर्नका लागि यो होडबाजीभन्दा पर थुप्रै नभनिएका कथा भन्ने प्रयत्न गर्नेछौं।

नेपालमा परम्परागत मिडियासँगै सयौंको संख्यामा अनलाइन पत्रिकाहरु भए पनि भन्न बाँकी कथा धेरै छन्। कसैले नसुनिदिएका तर सुन्नैपर्ने आवाज प्रशस्त छन्।  हाम्रो चेतनाका अंश बनिसकेका ती कथा र आवाज समेट्दै हामी अघि बढ्नेछौं। 

अहिले विश्व कोभिड– १९ को महामारीबाट संकटग्रस्त छ। यसले पत्रकारिताको आयाममा पनि परिवर्तन ल्याउँदै छ। रिपोर्टिङका तरिकामा फेरबदल आएको छ। यो महामारी र बन्दाबन्दीको चुनौतीका बीच बदलिएको परिस्थितिमा हामी हाम्रा पाठकलाई निरन्तर सुसूचित गराइरहनेछौं।

अन्त्यमा, गणतन्त्र दिवसकै दिन नेपाल समयले यात्रा आरम्भ गरेको थियो। गणतन्त्र दिवस र नेपाल समय स्थापना दिवसको यो पावन अवसरमा हामी हाम्रा पाठकप्रति आभार र शुभकामना व्यक्त गर्दछौं।