दक्षिण एसियामा २६७६३ संक्रमित, कहाँ कतिको मृत्यु ?

काठमाडौं- विश्वव्यापी महामारीको रुपमा फैलिएको कोरोना भाइरसबाट दक्षिण एसियाका आठ देशमा २६ हजार ७ सय ६३ जना संक्रमित भएका छन् ।

आइतबार बिहानसम्मको तथ्यांकअनुसार अहिलेसम्म कोरोनाबाट दक्षिण एसियामा ७ सय ८५ जनाको मृत्यु भएको छ । मृतक र संक्रमितको संख्या सबैभन्दा धेरै छिमेकी मुलुक भारतमा रहेको छ ।

भारतमा अहिलेसम्म कोरोनाबाट १५ हजार ७ सय २३ जना संक्रमित भएका छन् भने ५ सय २१ जनाको मृत्यु भएको छ । भारतमा संक्रमण दर तिब्र गतिमा फैलिएको छ । औसतमा हरेक २४ घण्टामा कम्तिमा १ हजार नयाँ संक्रमित भेटिन थालेको छ ।

यस्तै पाकिस्तानमा ७ हजार ६ सय ३८ जना संक्रमित हुँदा १ सय ४३ जनाको मृत्यु भएको छ ।

दक्षिण एसियामा कोरोनाबाट तेस्रो प्रभावित मुलुकको सूचीमा रहेको बंगलादेशमा २ हजार १ सय ४४ जनामा जना संक्रमित भेटिएका छन् भने ८४ जनाको मृत्यु भएको छ । अफगानिस्तानमा ९ सय ३३ जनामा संक्रमण पुष्टि हुँदा ३० जनाको मृत्यु भएको छ ।

श्रीलंकामा अहिलेसम्म २ सय ५४ जना संक्रमित भेटिएका छन् भने ७ जनाको मृत्यु भएको छ । माल्दिभ्स, नेपाल र भुटानमा भने कोरोनाबाट अहिलेसम्म कसैको पनि मृत्यु भएको छैन् ।

माल्दिभ्समा ३५ जना संक्रमित भेटिएका छन् भने नेपालमा ३१ जनामा कोरोना पुष्टि भएको छ । कोरोनाबाट सबैभन्दा कम प्रभावित भुटानमा भने ५ जनामा मात्रै संक्रमण भेटिएको छ ।