सर्लाही । जिल्ला भन्सार कार्यालय सर्लाहीले आर्थिक वर्ष २०७८/७९ मा करिब ५२ करोड ८२ लाख रूपैयाँ राजस्व संकलन गरेको छ । कार्यालयले ६४ करोड २४ लाख ६१ हजार रूपैयाँ राजस्व संकलन गर्ने लक्ष्य लिएको थियो ।
जिल्ला भन्सार कार्यालयका कार्यालय प्रमुख मुरारीप्रसाद काफ्लेका अनुसार कार्यालयले आर्थिक वर्ष २०७८/७९ को कुल लक्ष्यको ८२ प्रतिशत बराबर प्रगति गरेको हो । कोरोना महामारी, स्थानीय निकायको निर्वाचन आदिका कारण अझै राजस्व सङ्कलनमा अपेक्षा गरेअनुसारको प्रगति हासिल गर्न नपाएको कार्यालय प्रमुख काफ्लेले बताए।
उनले कोरोना महामारीका कारण सीमानाका बन्द हुनु, स्थानीय निकायको निर्वाचनको प्रभाव पर्नु र छिमेकी देश भारतमा पनि भएको निर्वाचनको प्रभावका कारण अपेक्षाअनुसार राजस्व संकलन गर्न नपाएको बताए।
जिल्लामा छोटी भन्सार कार्यालय र मुख्य भन्सार कार्यालयसहित आठवटा भन्सार कार्यालय रहेका भए पनि जिल्लाका दुई छोटी भन्सार कार्यालय मात्र सञ्चालन हुनु, कोरोना महामारीका कारण सीमानाका बन्द हुनु, स्थानीय निकाय निर्वाचनको प्रभाव पर्नु र भारतमा भएको निर्वाचनको प्रभावले अपेक्षाअनुरुप राजस्व संकलन हुन नसकेको कार्यालयले जनाएको छ ।
जिल्लाबाट निकासी पैठारी, लिलामी र अस्थायी पैठारीलगायतका कामबाट आव २०७८÷७९ मा ५२ करोड ८२ लाख रूपैयाँ राजस्व संकलन भएको कार्यालयले जनाएको छ । भन्सार कार्यालयले आव २०७८÷७९ को साउनमा ३९ करोड ३३ लाख रूपैयाँ, भदौमा ५४ करोड ६१ लाख सर्लाही, असोजमा ५१ करोड ६३ लाख रूपैयाँ, कात्तिकमा ४६ करोड ८१ लाख रूपैयाँ, मङ्सिरमा ६३ करोड १९ लाख रूपैयाँ, पुसमा ६२ करोड ४४ लाख रूपैयाँ, माघमा ५४ करोड ५० लाख रूपैयाँ, फागुनमा ३५ करोड ६४ लाख र चैतमा २७ करोड ९२ लाख रूपैयाँ राजस्व संकलन गरेको छ ।
त्यसैगरी वैशाखमा ३५ करोड ३१ लाख रूपैयाँ, जेठमा २८ करोड ३७ लाख र असारमा २८ करोड ४१ लाख रूपैयाँ राजस्व संकलन गरेको कार्यालय प्रमुख काफ्लेले जानकारी दिए । जिल्ला भन्सार कार्यालयले आव २०७७÷७८ मा ६० करोड ५९ लाख र आव २०७६÷७७ मा ३३ करोड ६६ लाख रूपैयाँ राजस्व संकलन गरेको थियो ।
