चोरीमा संलग्न रहेको आरोपमा पूर्वहवल्दारसहितको गिरोह पक्राउ

काठमाडौं- चोरीमा संलग्न रहेको आरोपमा नेपाल प्रहरीका एक भगौडा हवल्दारसहितको समूह पक्राउ परेको छ।

महानगरीय अपराध अनुसन्धान महाशाखा, टेकुले पूर्वहवल्दार दोलखाका ३० वर्षीय रवि कार्कीसहित १९ वर्षीय राजन खनाल र काभ्रेका २० वर्षीय उपेन्द्र खरेललाई चोरी आरोपमा पक्राउ गरेको हो ।

उनीहरूले चोरीको गिरोह चलाइरहेको प्रहरीले जनाएको छ।

प्रहरीका अनुसार यो समूह दिउँसो कार लिएर चोरी गर्न हिँड्ने गरेको थियो। पछिल्लो पटक गत पुस २८ मा भत्केको पुल नजिकै बालकुमार थपलियाको घरमा डेरा गरी बस्ने विष्णु कार्कीको कोठामा चोरी गरेपछि उक्त समूह समातिएको प्रहरीले जनाएको छ।

उनीहरूले कार्कीको कोठाबाट दुई लाख रुपैयाँ नगद, २० तोला सुनका गहना र सामसुङ कम्पनीको एउटा मोबाइल चोरी गरेको प्रहरीको भनाइ छ।