पहिरोमा परी पोखरामा तीनजनाको मृत्यु, १ बेपत्ताा

पोखरा- बुधबार राती परेको अविरल वर्षाका कारण पहिरो जाँदा पोखरामा तीनजनाको ज्यान गएको छ। जिल्ला प्रहरी कार्यालय कास्कीका प्रवक्ता सुवास हमालका अनुसार पोखराको भलाम र काहुँमा गएको पहिरोमा उनीहरूको ज्यान गएको हो। 

उनका अनुसार पोखरा महानगरपालिका २० भलाममा पहिरोमा परी ४५ वर्षीय कृष्ण श्रेष्ठ र उनकी श्रीमती सुनमाया तामाङ श्रेष्ठको मृत्यु भएको हो। 

उनका तीन वर्षीय छोरा सन्तोष श्रेष्ठ बेपत्ता भएका छन्। यस्तै ९ वर्षीय छोरा राजकुमार श्रेष्ठ घाइते भएका छन्। बेपत्ताको खोजीकार्य भइरहेको हमालले बताए। 

यसैगरी पोखरा महानगरपालिका-११ काहुँमा पहिरोले ब्लकको घर भत्काएर पुरिँदा ४२ वर्षीया लक्ष्मी नेपालीको मृत्यु भएको छ। उनकी १४ वर्षीया छोरी सृटि नेपाली घाइते भएकी छन्। पोखराको कसेरीमा पहिरोले घर भत्काउँदा एकदेव तिमिल्सिना, उनकी श्रीमती र छोरी घाइते भएका छन्। उनीहरूको मणिपाल अस्पतालमा उपचार भइरहेको छ।  

अविरल वर्षाका कारण पोखराको नदिपुरमा जमिन भासिँदा तीन घर जोखिममा परेका छन्।