मेघ गर्जनसहित वर्षाको सम्भावना

काठमाडौं – पश्चिमी न्यूनचापीय वायुको प्रभावले देश भरको मौसम केही दिनेदेखि प्रभावित बनेको छ। मौसम पूर्वानुमान महाशाखाका अनुसार मौसममा आएको खरावीका कारण देशभर कही आंशिकदेखि कही मेघ गर्जनसहित क्षणिक वर्षाको सम्भावना रहेको छ।

महाशाखाका वरिष्ठ मौसमविद् वरुण पौडेलका अनुसार आइतबार वायुको प्रभावले देशभर आंशिकदेखि पूर्ण बदली रही मध्य र पश्चिमी भूभागका केही स्थानमा मेघ गर्जनसहित क्षणिक वर्षाको सम्भावना रहेको छ। उनले पश्चिमी न्यूनचापीय प्रभाव पूर्वतिर सर्दै गएकाले सोमबारदेखि पश्चिमी क्षेत्रबाट मौसम क्रमिक सुधार हुने जानकारी दिए। 

प्रिमनसुनको समय भएकाले यस्ता गतिविधि दोहोरिरहने बताइएको छ। पूर्वी क्षेत्रका केही स्थानमा बिहानदेखि नै हल्का वर्षा भइरहेको छ। 

राति देशको पूर्वी भूभागमा सामान्य बदली रही मध्य र पश्चिमी भेगका केही स्थानमा मेघ गर्जनसहित क्षणिक वर्षाको सम्भावना रहेको महाशाखाले जनाएको छ। सोमबार देशका पहाडी भूभागमा आंशिकदेखि सामान्य बदली रही पश्चिमी क्षेत्रका केही स्थान र तराई भेगका एक दुई स्थानमा छिटपुट वर्षाको सम्भावना रहेको महाशाखाले जनाएको छ। 

त्यस्तै मङ्गलबार देशका पहाडी भूभागमा आंशिक बदली रही बाँकी भूभागमा सामान्यतया मौसम सफा रहनेछ। पहाडी क्षेत्रका केही स्थानमा मेघ गर्जनसहित क्षणिक वर्षाको सम्भावना रहेको मौसम पूर्वानुमान महाशाखाले जनाएको छ। 

महाशाखाको पछिल्लो विवरणअनुसार आज काठमाडौं उपत्यकाको न्यूनतम तापक्रम १३ दशमलव ४ डिग्री र अधिकतम तापक्रम २४ दशमलव शून्य डिग्री सेल्सियस रहेको छ।