नेपालको फिफा वरीयतामा एक अंक सुधार

काठमाडौं- फिफा वरीयतामा नेपालले यसअघिको स्थानमा एक अंक सुधारेको छ। बिहीबार फिफाले जारी गरेको नयाँ वरीयतामा नेपाल एक अंकको स्थान सुधार गर्दै १७४औं स्थानमा रहेको हो। नेपाल यसअघि डिसेम्बरमा जारी वरीयतामा १७५औं स्थानमा थियो।

दक्षिण एसियाका देशमध्ये भारत १०१औं, माल्दिभ्स १५४औं, भुटान १८५ र बंगलादेश १९२, पाकिस्तान १९५औं र श्रीलंका २०७औं स्थानमा रहेका छन् ।   
फिफाको नयाँ वरीयतामा अर्जेन्टिना शीर्ष स्थानमा उक्लिएको छ। पछिल्लो ६ वर्षपछि  अर्जेन्टिना फिफा वरीयतामा पहिलो पटक शीर्ष स्थानमा उक्लिएको हो।
यसअघि दोस्रो स्थानमा रहेको अर्जेन्टिना विश्वकप जितेपछि खेलेका दुई मैत्रीपूर्ण खेल जितेपछि एक स्थान सुधार गर्दै शीर्ष स्थानमा उक्लिएको हो। ब्राजिल पहिलो स्थानबाट तेस्रो स्थानमा पुगेको छ।

विश्वकप उपविजेता फ्रान्स दोस्रो स्थानमा उक्लिएको छ। बेल्जियम चौथो स्थानमा कायम छ भने इंग्ल्यान्ड पाँचौं, नेदरल्यान्ड छैटौं, क्रोसिया सातौं, इटाली आठौं, पोर्चुगल नवौं र स्पेन दसौं स्थानमा रहेका छन्।