ए डिभिजन लिगमा सातदोबाटो र हिमालयन शेर्पा विजयी

काठमाडौं- सहिद स्मारक ए डिभिजन लिगमा बुधबार सशस्त्र प्रहरी बलको एपीएफ क्लबलाई सातदोबाटो युथ क्लबले  १–० को नतिजामा पराजित गरेको छ। च्यासल रंगशालामा भएको खेलको ५५औं मिनेटमा विलियम ओपोकुको निर्णायक गोलमा सातदोबाटो विजयी बन्यो।

एपीएफका गोलकिपर युया कुरियामा अगाडि बढेको समयमा ओपोकुले सेन्टर सर्कलबाट गरेको प्रहार उत्कृष्ट गोलमा परिणत भएको थियो।

त्यसअघि पहिलो हाफको इन्जुरी समयमा सातदोबाटोका इभान मेरितले हेडरमार्फत गरेको प्रहार क्रसबारमा लागेर फर्किएको थियो।

जितसँगै सातदोबाटोले दुई खेलबाट ६ अंक जोडेको छ। पराजित एपीएफको तीन अंक छ। 

बुधबार नै दशरथ रंगशालामा भएको खेलमा हिमालयन शेर्पा क्लबले नेपाल पुलिस क्लबलाई १–० को नतिजामा पराजित गरेको छ। अम्रित श्रेष्ठले इन्जुरी समयमा गरेको एक मात्र गोल टिमबा लागि निर्णायक बन्यो।