शृंखलाको अन्तिम खेलमा नेपाल र युएई भिड्दै

काठमाडौं– युएईमा जारी आईसीसी विश्वकप लिग २ अन्तर्गतको त्रिकोणात्मक शृंखलाको अन्तिम खेल आज दुबई रंगशालामा हुँदैछ। उक्त खेलमा नेपालले आयोजक टिम युएईको सामना गर्न लागेको हो।

यो शृंखलामा विदेशमा हुने शृंखलामध्ये नेपालका लागि अन्तिम शृंखलामात्र होइन अन्तिम खेलसमेत हो। त्यसैले नेपाल यो खेलमा जित निकाल्दै युएईसँगको अंकदुरी घटाउने मात्र होइन पाँचौ स्थानमा बढुवा हुन चहान्छ। अहिले युएई नेपालभन्दा एक अंकले अघि रहेको छ। यता, नेपालले ३० खेल मात्र खेलेको छ भने युएईले एक खेल धेरै खेलेको छ। यद्यपी नेपालको नेट रन रेट युएईको भन्दा कम रहेको छ।

यदी आजको खेलमा जित निकाल्न सके नेपालले यूएईलाई एक अंक पछि छोड्ने छ। त्यसैले नेपालको पहिलो लक्ष्य भनेको जित निकाल्ने हुनेछ।  जारी शृंखलाको यसअघिको खेलमा भने नेपालले तीन खेलमध्ये दुईमा जित निकालेको छ।
तर युएईसँगको पछिल्लो खेलमा भने नेपालले जित निकाल्न सकेन। तर आज पौने १२ बजेबाट सुरु हुने खेलमा नेपाल जितको लक्ष्यसँगै मैदान उत्रने छ। युएईसँगको खेलमा हार बेहोरेपछि नेपालको लागतार छ जितको शृंखला तोडिएको थियो। त्यसैले आजको खेलमा जित निकालेर फेरी नेपाल जितको नयाँ शृंखला अघि बढाउन चहान्छ।

यद्यपी आजको खेलमा ओपनिङ ब्याटर कुशल भुर्तेल हुनेछैनन्। उनी चोटको कारण टिमबाहिर रहने भएका छन्। त्यसैले नेपाल क्रिकेट संघ क्यानले उनको ठाउँमा सन्दीप जोरालाई स्थान दिएको छ।