सातदोबाटो र मछिन्द्र केपी ओली कपको फाइनलमा

काठमाडौं- सहिद स्मारक ए डिभिजन लिगको विजेता मछिन्द्र क्लब काठमाडौंमा जारी केपी ओली कप फुटबलको फाइनलमा प्रवेश गरेको छ। 

सातदोबाटोस्थित एन्फा कमप्लेक्समा सोमबार सम्पन्न भएको दोस्रो सेमीफाइनल खेलमा आयोजक केपी ओली फुटबल क्लबलाई हराउँदै मछिन्द्र फाइनलमा पुगेको हो।

मछिन्द्रका लागि पहिलो हाफमा विमल घर्तिमगरले गोल गरेका थिए। उनले डिफेन्डर रन्जित धिमालको पासलाई सदुपयोग गर्दै गोल गरेका थिए।
यता, आइतबार वर्षाको कारण रोकिएको पहिलो सेमीफाइनल खेल पनि सोमबार सम्पन्न भएको छ। सडन डेथसम्म पुगेको सो सेमीफाइनल खेलमा सातदोबाटो युवा क्लबले विभागीय क्लब त्रिभुवन आर्मीलाई हराउँदै फाइनलमा प्रवेश गरेको थियो।
यता मछिन्द्र क्लब भने झापामा आयोजित भद्रपुर झापा गोल्डकपको पनि फाइनलमा पुगेको छ। यसकारण उनसले तीन दिनमा लगातार तीन खेल खेलेको छ।